Azken egunotan, Zumaiako Herri Eskolan berriz elkartu gara Otxagabiako institutuko lagunekin, eta bigarren topaketa honek bizipen ahaztezinak utzi dizkigu.
Duela hilabete batzuk gure ikasleak Otxagabian izan ziren, bertako familien etxeetan esperientzia aberasgarria biziaz. Oraingoan, berriz, haiek etorri dira gurera, eta guk ere etxeetako ateak ireki dizkiegu, elkartrukearen benetako espiritua partekatuz.
Egun hauetan zehar, jarduera ugari egin ditugu: ikaskuntza, jolasak, irteerak eta batez ere elkarrekin egoteko aukera. Aurreko bisitan sortutako loturak sendotu dira, eta giroa ezin hobea izan da, errespetuan, konfiantzan eta adiskidetasunean oinarrituta.
Elkartruke honek balio garrantzitsuak indartu ditu: enpatia, elkartasuna, aniztasunarekiko errespetua eta bizikidetza. Horrelako esperientziek gure ikasleen hazkunde pertsonal eta soziala aberasten dute, eta betiko oroitzapenak sortzen dituzte.
Eskerrik asko Otxagabiako ikasleei, familiei eta irakasleei esperientzia hau posible egiteagatik. Harremanak bizirik jarraitzen du!
Zumaiako Herri Eskolak, Txikipedia proiektuaren baitan, egindako lana jendaurrean aurkeztuko du aste honetan Zumaiako Oxford aretoan egingo den erakusketan.
Ibilbide aberats eta inspiratzailea izan da: lehen urtean, Aquariumarekin elkarlanean, arrainen inguruko lana egin genuen; bigarrenean, Pagoetako Parke Naturalarekin batera, landare itsutasuna landu genuen; eta aurten, Soinuenearekin elkarlanean, musika-tresnen mundua izan dugu ardatz.
Aurtengo proiektuan, 4. mailako ikasleek egindako collageak izan dira irudiak, eta 1. Batxilergoko Musikako ikasleek osatu dituzte artikuluak. Urtero bezala, proiektuaren emaitza poster berezi bat izan da: ikasleen irudi guztiak biltzen ditu, eta bertan dagoen QR kodearen bidez zuzenean ireki daitezke musika-tresna horiei buruzko Txikipediako artikuluak.
Gainera, joan den astean bailarako ikastetxe publikoetan izan ginen proiektuaren berri ematen, eta poz handiz ikusi genuen gure aurtengo posterrak harrera bikaina izan zuela guztietan.
Ezagutza, sormena eta elkarlana uztartzen dituen proiektu hau gertutik ezagutzera gonbidatzen zaituztegu. Zatozte erakusketara!
DBH4. mailako Adierazpen Artistikoa ikasgaiko ikasleek Grabatua, erreprodukzio teknika tailerraz gozatzeko aukera izan dute Olaia Martinez, autore eta ilustratratzaile profesionalaren eskutik. Bi saio izan dituzte, lehena matriza sortzeko eta bigarrena tinta beltzez zikindu, jolastu, sortu etanorbere irudiak grabatzeko.Esperientzia aberatsa izan da, artista batekin kontaktu zuzena izateaz gain, Grabatuaren prozesua ezagutu eta esperimentatzeko aukera izan dutelakoEskerrik asko Olaia!!
Aurreko ostiralean Lanbide Heziketako Azoka ospatu genuen Zumaiako Herri Eskolan!
Urola Kosta eta Urola Erdia eskualdeko Lanbide Heziketako eskaintza ezagutzeko aukera paregabea izan zuten bailarako ikasleek. Goizean zehar, DBH eta Batxilergoko ikasleek hartu zuten parte ekimenean; horretarako, ikastetxeekin koordinazio-lanak egin ziren, azokara txandaka hurbildu zintezen.
Hala, Azkoitia, Azpeitia, Orio, Zarautz eta Zumaiako 14 ikastetxetako 700 gazte inguru igaro ziren bertatik, etorkizuneko bide profesionalak ezagutzeko, galdetzeko eta inspiratzeko.
Arratsaldean berriz, azoka herritar guztientzat zabalik egon zen Kofradia plazan.
Eskerrik asko parte hartu duten ikastetxeei: Zumaiako Herri Eskola Irudika LHII Oteitza Lizeo Politeknikoa Oinarrizko Lanbide Heziketa: Soldadura Izarraitz Lanbide Heziketa
Eta mila esker bertaratu zareten ikasle, irakasle eta herritar guztiei! Etorkizuneko aukerak gertutik ezagutzea beti da pausu garrantzitsua.
Zumaiako Herri Eskola
